ఆమె పేరు సుచేతన భట్టాచార్య. పశ్చిమ బెంగాల్ మాజీ ముఖ్యమంత్రి బుద్ధదేవ్ భట్టాచార్య కుమార్తె. ఆమె వయసు ప్రస్తుతం 41 సంవత్సరాలు. తాను పుట్టుకతో మహిళనే అయినప్పటికీ.. చిన్నప్పటి నుంచి మానసికంగా పురుషుడి లాగానే జీవిస్తోంది. అయితే మానసికంగానే కాకుండా శారీరకంగానూ పురుషుడిగా మారాలని ఇటీవల ఆమె నిర్ణయించుకుంది. ఇదే విషయంపై న్యాయ నిపుణులు, వైద్యులు, ఇతర నిపుణుల సలహాలు తీసుకున్నారు. వాటికి సంబంధించిన విషయాలను ఆమె మీడియాతో పంచుకున్నారు. దీంతో తాను లింగ మార్పిడి చేయించుకునేందుకు సిద్ధమైనట్లు సుచేతన భట్టాచార్య వెల్లడించారు.
సుచేతన భట్టాచార్య.. ఇటీవల నిర్వహించిన ఎల్‌జీబీటీక్యూ వర్క్‌షాప్‌నకు హాజరయ్యారు. ఆ తర్వాత పుట్టినప్పటి నుంచి తాను పురుషుడిగా భావిస్తూ.. పురుషుడిగానే జీవిస్తున్న ఆమెకు అదే నమ్మకం మరింత బలపడింది. దీంతో 41 ఏళ్ల వయసులో లింగ మార్పిడి ఆపరేషన్ చేయించుకోవాలని నిర్ణయించుకున్నారు. దీని వల్ల మానసికంగానే కాకుండా శారీరకంగా కూడా పురుషుడిలాగే ఉండాలని కోరుకుంటున్నట్లు వెల్లడించారు. అయితే తాను పురుషుడిగా మారిన తర్వాత తన పేరును సుచేతన భట్టాచార్య నుంచి సుచేతన్‌గా మార్చుకోనున్నట్లు తెలిపారు. అయితే అందు కోసం సంబంధిత న్యాయ, వైద్య సలహాలు తీసుకుంటున్నట్లు పేర్కొన్నారు.
తన జీవితానికి సంబంధించిన అన్ని నిర్ణయాల లాగానే మహిళ నుంచి పురుషుడిగా మారాలనే నిర్ణయాన్ని తానే స్వయంగా తీసుకున్నట్లు సుచేతన భట్టాచార్య తెలిపారు. ఎల్‌జీబీటీక్యూ ఉద్యమంలో భాగంగానే పురుషుడిగా మారుతున్నట్లు ఆమె వెల్లడించారు. అదే సమయంలో ప్రతిరోజూ ట్రాన్స్‌ మ్యాన్‌గా తాను ఎదుర్కొంటున్న సామాజిక వేధింపులను తట్టుకునేందుకు లింగ మార్పిడి ఆపరేషన్ ఉపయోగపడుతుందని పేర్కొన్నారు. ఇప్పటికే తాను మానసికంగా పురుషుడినని భావిస్తున్నానని.. ఈ లింగ మార్పిడి ఆపరేషన్ పూర్తి అయితే శారీరకంగా కూడా పురుషుడి లాగే ఉంటానని స్పష్టం చేశారు.
తాను తన ఇష్టపూర్వకంగా ఈ నిర్ణయం తీసుకున్నానని.. ఈ విషయంపై ఎవరూ వివాదం కానీ.. రాద్దాంతం కానీ చేయవద్దని సుచేతన భట్టాచార్య విజ్ఞప్తి చేశారు.తాను తీసుకున్న ఈ నిర్ణయం తన తల్లిదండ్రులు, కుటుంబ సభ్యులు నుంచి ఎలాంటి సమస్య లేదని చెప్పారు. అయితే ఈ వివాదంలోకి తన తల్లిదండ్రులను లాగవద్దని మీడియాకు సూచించారు. చిన్నతనం నుంచి తన గురించి పూర్తిగా తెలిసిన తండ్రి తన నిర్ణయానికి మద్దతు ఇస్తారని భావిస్తున్నట్లు తెలిపారు.
